"సినిమా అంటే ఉన్నంతసేపూ ఎంటర్టెయిన్ చెయ్యకపోయినా ఆసాంతం విసిగించకుండా ఉంటే చాలు అనుకునే క్యాండిడేట్‌ని నేను ... ఈ కారణం వలనే నచ్చి ఉంటాడు ఈ గణేష్"
కథ క్లుప్తంగా - ఏమీ లేదు ...
అంటే చెప్పుకునేంత ఏమీ లేదు అని ...
సరే సరే ఒక లైనులో ... "ప్రేమికులైన ఫ్రెండ్సు కి పెళ్ళి చెయ్యడానికి హీరోయిన్ ని ప్రేమించినట్టు నటించాలనే(అవసరం లేదు కానీ సినిమా కోసం తప్పలేదు) వింత ప్రయత్నం లో ఆ హీరోయిన్ని నిజంగా ప్రేమించి, తర్వాత నిజం తెలిసిన హీరోయిన్ని ఎలా కన్విన్స్ చేసాడు" ... అంతే
కథ ఎలా నడిచిందంటే:
అలా హీరోయిన్ ని లైన్ లో పెట్టడానికి వాళ్ళ అపార్ట్మెంట్ కి వెళ్ళిన హీరో గారికి అక్కడ ఒక చిన్న వానరమూక ఎదురవుద్ది ... వారిని ఎలా convince చేసి హీరోయిన్ కి దగ్గరయ్యాడు అనేది మొదటి భాగమ్. రెండో భాగం అంతా మనసు విరిగిన హీరోయిన్ ని హీరో convince చెయ్యడం గురించి ఉంటుంది.
3 వంతుల సినిమా(3వ వంతు వరకూ) బాగుంది ... చివరాఖరి వంతు డ్రాగింగ్ ఉంది కానీ పర్లేదు లాగించెయ్యొచ్చు. మొదటి సగం లో పిల్లలతో చేసిన అల్లరి చాలా బాగుంది. పిల్లల చేత డబుల్ మీనింగ్ డైలాగ్స్, లవ్ ఎఫైర్స్ నడుపుతున్న ఈ కాలంలో ఇలా పిల్లల్ని పిల్లల్లా, వాళ్ళ అమాయకత్వాన్ని హైలెట్ చేస్తూ చూపించిన తీరు బావుంది. వాళ్ళ అల్లరికి మొదటి సగం అసలు టైమే తెలియలేదు. వాళ్ళ అల్లరిలో ప్రేమ సన్నివేసాలు కూడా తలకెక్కలేదు. హీరోయిన్ ని లవ్ లో పడెయ్యడానికి మన హీరో గారి కొత్త ట్రాక్ బాగుంది. మధ్యలో ఒక రౌడీ గ్యాంగ్ కూడా ఉంది.
రెండో భాగం లో విడిపోయిన ప్రేయసిని convince చెయ్యడానికి 5 ని॥ టైం అడగడం, దానిలో ఒక్కొక్క నిమిషం తీసుకోవడం సరదాగా సాగిపోయింది. ఆ 5 ని॥ అయ్యిన దగ్గర్నుంచీ మత్రం బుర్ర తినేసాడు. కానీ మరీ తల బాదుకునేంత మాత్రం కాదు.
పిల్లల ఎపిసోడ్స్ బాగున్నాయి. రెండవ భాగం లో కూడా వారి నిడివి పెంచుంటే బాగుండేదనిపించింది.
హీరో- రాం: మొదటి సినిమా లో లాహిరి లహిరి లాహిరి లో లో ని ఆదిత్య లా కనపడ్డాడు. కానీ ఆ ఓవర్ యాక్టింగ్ తగ్గించాడు చాలా వరకూ. హడావుడి లేకుండా నెమ్మదిగా మాటాడుతూ బాగా నచ్చేసాడు. ఆ 5ని॥ల సన్నివేశాలలో పవన్ ని ఇమిటేట్ చేసాడా లేదా అన్నది పక్కన పెడితే మస్తు ఎంజాయ్ చేసాను నేనైతే వీడి కామెడీని. సీరియస్ సన్నివేశాలు కూడా మన చేత బ్రహ్మం expressions పెట్టనీయకుండా ఆకట్టుకున్నాడు. చాలా improvement మునుపటి సినిమాలతో పోలిస్తే. డ్యాన్సులు ఇరగదీస్తున్నాడు. ఫైట్లు చాలావరకూ వైర్లు వాడుతున్నాడు. ఇలాంటి సినిమాల్లో ఓకే కానీ అన్నిటిలో అదే అంటే కష్టమే! ... ఓవరాల్ గా నచ్చాడు ...
కాజల్ - ఈ సినిమా కి స్పెషల్ ఎఫెక్ట్స్ లాంటిది. మగధీర మ్యానియా తర్వాత కనపడిందేమో భలే ఉంది . అక్కడక్కడా భయపెట్టినా బాగా చేసింది. ఖుషి సినిమా లో భూమిక తరహా పాత్ర తనది. అంత కాకపోయినా బాగుంది.
పిల్లలు - వీళ్ళ వలనే సినిమా. పేర్లు తెలీవు కాబట్టి ... ఇలా చెప్పుకుందాం. హీరో ని నిజం గా నే హీరో అనుకునే అమాయకపు కళ్ళజోడు కుర్రాడు, అది అబద్దమని గట్టిగా నమ్మే లీడర్ గా చేసిన బొద్దు కుర్రాడు, ట్యూషన్ తప్పించుకోడానికి 70% మార్కులు తెచ్చుకుంటానని పందెం కాసిన బుడతడు, ప్రపంచపు మొదటి సూపర్ వొమన్ అవుతాననే ఇంకో పాప ... అందరూ ఇరగదీసారు. వాళ్ళ యాక్టింగ్ ముందు వీళ్ళు చిన్న పిల్లల్లా కనపడ్డారు. సినిమా ఎలా ఆడినా సగం క్రెడిట్స్ వీళ్ళకి ఇచ్చెయ్యొచ్చు.
విలన్ - ఆశిష్ విద్యార్థి ... పెద్ద స్కోప్ లేదు కానీ అదో కామెడీ ట్రాక్. బ్రహ్మానందంతో హీరో చేసే అల్లరి కూడా బాగుంది. విలన్ పాత్రని సినిమాలో క్రూరంగా చూపిస్తూనే సడెన్‌గా కామెడీ చేసేసాడు. ఆ పాత్ర నాకు బానే సెట్ అయిందనిపించింది. పిల్లల దగ్గర హీరో ని హీరోని చెయ్యడం ఈ పాత్ర ముఖ్యోద్దేశ్యం కావొచ్చు.
పూనం కౌర్, రోహిణి హట్టంగడి, ఇంకా చాలామంది ఉన్నారు. చెప్పుకోవలసినది ఏమిటంటే ఎవరూ ఎక్కువ యాక్టింగ్ చెయ్యలేదు. అంటే ఎవరూ వాళ్ళ యాక్టింగ్ తో విసుగు తెప్పించలేదు అని.
సంగీతం, పాటలు, మాటలు: పాటలు అంతగా ఎక్కలేదు. కొన్ని కొన్ని పాటలు చాలా చిరాకు తెప్పించాయి. మంచిగా వెళుతున్న సినిమాలో అసహనానికి గురి చేసాయి. చాలా వరకూ ఎవాయిడ్ చెయ్యదగినవే. రెండు పాటల్లో మంచి స్టెప్స్ వేసాడు రాం. చాలా కష్టపడుతున్నాడు డ్యాన్స్ విషయంలో. మాటలు వచ్చి పిల్లల పంచ్ డైలాగ్స్, హీరో-హీరోయిన్ల మధ్య సంభాషణలు బాగున్నాయి. కోట్ చేసేంత అంటే ఒక్క డైలాగ్ ఉంది - "క్షమించగలిగేవాళ్ళే ఎక్కువ ప్రేమించగలరు".
డైరెక్షన్ బాగానే ఉంది. పాత పచ్చడినే కొత్తగా చేసి వడ్డించడం తెలిసిన దర్శకుడే. మొత్తమ్ సినిమా అంతా ఎక్కడో చూసినట్టే ఉంటది. కానీ కొత్తగా ఉంటుంది. అది చాలు నాలాంటి సగటు ప్రేక్షకుడికి. హీరో చివరికి చేతులు కోస్కోవడం ఒక్కటి తక్క ఎక్కడా చెత్త పోకడలకి పోలేదు. రెండవ భాగం అంత డ్రాగ్ చెయ్యకుండా ఉంటే ఇంకా బావుండేది. ఆ విలన్ గ్యాంగ్ ని చివర్లో కొంచెం కామెడీ టచ్ తో అంతం చేసుంటే బాగుండేది ... ఇలా కూడా బానే ఉందనుకో!
ఓవరాల్ గా సినిమా ఒకసారి చూడగలిగిన సినిమా. చిన్నపిల్లలకి, చిన్నపిల్లలు నచ్చేవారికీ, లాజిక్స్ వెతక్కుండా చూసేవారికీ ఈ సినిమా నచ్చి తీరుతుంది. తప్పకుండా చూడండి మరి :-)
